O Porto de Marín viviu en 2025 un dos seus anos máis intensos en materia de infraestruturas. Doce actuacións principais executáronse ao longo do exercicio, cun investimento global de 6,4 millóns de euros, ás que se sumou a tramitación de dous novos proxectos valorados noutros 2,4 millóns. Un balance que, segundo a Autoridade Portuaria, reflicte unha rada en constante evolución, decidida a modernizarse e a avanzar cara a un modelo máis eficiente e sostible.
Boa parte destas actuacións contaron con financiamento europeo. Grazas aos fondos do Mecanismo de Recuperación e Resiliencia, o porto deu un importante salto tecnolóxico coa instalación de equipos de telemedida para controlar os consumos eléctricos e cunha profunda mellora da iluminación exterior. As antigas lámpadas de vapor de sodio deixaron paso a luminarias LED, renováronse torres de iluminación e executáronse novas canalizacións subterráneas, reducindo de forma notable o consumo enerxético. Esta aposta pola eficiencia tamén chegou ao interior da sede da Autoridade Portuaria, onde os fluorescentes foron substituídos por pantallas LED.
O compromiso coa innovación continuou cos fondos FEDER, que permitiron finalizar en 2025 a primeira fase da automatización e monitorización da rede ferroviaria interior do porto.
Ademais, xa está en marcha a licitación dunha actuación para instalar enerxías renovables en varios edificios portuarios mediante paneis fotovoltaicos. O obxectivo é que máis do 80% da enerxía producida se destine ao autoconsumo, reducindo tanto a dependencia da rede eléctrica xeral como as emisións contaminantes.
O sector pesqueiro tamén foi protagonista pois, con cargo aos fondos FEMPA, executáronse melloras na lonxa, como a renovación da súa cuberta e da rede de pluviais, e prevese a instalación de sistemas de autoconsumo fotovoltaico para o propio edificio, reforzando a súa eficiencia e funcionalidade.
A estes investimentos sumáronse outras obras relevantes que melloran o día a día do porto e a súa conexión coa vila de Marín como a conexión das augas residuais ao novo colector municipal, a renovación de pavimentos en viarios e peiraos, a substitución da báscula de pesada de camións no peirao de Leirós ou a instalación de novos paneis nas defensas do Peirao Comercial Oeste.
No ámbito marítimo, 2025 deixou ademais unha actuación tan singular como simbólica como é a adxudicación das obras de rehabilitación da torre baliza de Camouco, na canle norte da illa de Ons. Unha complexa intervención que permitirá demoler e reconstruír esta emblemática axuda á navegación, de 13 metros de altura, garantindo a súa operatividade e seguridade para o tráfico marítimo.