O Partido Popular de Pontevedra solicita a adopción de "medidas urxentes" para mellorar a atención cidadá en todas as dependencias municipais.
Reclaman a ampliación dos horarios de atención con cita previa e a eliminación deste requisito para as persoas maiores de 65 anos que así o desexen en todas as dependencias municipais. O obxectivo, aseguran, é "facilitar o acceso de toda a cidadanía á administración local".
Os populares subliñan que estas reclamacións chegan despois de denunciar as dificultades que "nos trasladan moitos pontevedreses, especialmente as persoas maiores, para recibir atención presencial".
A través da concelleira Silvia Junco, lembran que o sistema de cita previa dixital foi implantado a finais de xullo de 2020 para garantir a seguridade sanitaria e axilizar a atención ao público a raiz da pandemia polo COVID-19.
Con todo, "unha vez superada aquela situación excepcional, non se volveu a adaptar o servizo ás necesidades das persoas con menos competencias dixitais", lamenta.
Actualmente, algúns trámites relacionados co Rexistro Xeral e o Padrón permiten unha atención máis accesible sen cita previa, pero "é necesario que se reserven espazos e horarios para atender directamente a aquelas persoas que o necesiten, especialmente a quen non senten capacitadas para utilizar ferramentas dixitais", defende Junco.
A prioridade do Partido Popular é "que os nosos veciños sexan atendidos canto antes e cunha ampla cobertura horaria", asegura, á vez que insiste en que o papel das institucións é garantir unha atención "próxima e eficaz".
Así mesmo, critica que o BNG non haxa implementado ningunha das medidas contempladas no primeiro Plan Estratéxico para as Persoas Maiores do Municipio que fora aprobado por unanimidade en novembro de 2025, tras a presentación dunha moción do PP.
Ademais de flexibilizar a atención presencial, os populares propuxeron que se impulsen programas específicos de formación e dixitalización dirixidos a das persoas maiores para así "previr o illamento, promover un envellecemento activo e favorecer a súa autonomía".