O Pleno do Consello Social da UNED aprobou a proposta do xurado dos Premios ás Boas Prácticas de Xestión 2024, e entre a galardoados figura a UNED de Pontevedra.
O centro asociado de Monte Porreiro foi recoñecido cun dos premios dotados con 5.000 euros polo seu proxecto no Centro Penitenciario da Lama.
Segundo destacaron desde esta institución académica, este recoñecemento pon en valor o firme compromiso do centro coa inclusión, a igualdade de oportunidades e a reinserción educativa e social.
Desde fai máis de quince anos, a UNED Pontevedra desenvolve no cárcere da Lama un programa que abre as portas da educación superior a persoas privadas de liberdade. Grazas a esta iniciativa, os reclusos poden acceder a estudos de acceso para maiores de 25 anos, graos, másteres, cursos de extensión universitaria e mesmo ao programa UNED Senior, dirixido a maiores de 55 anos.
Conscientes das dificultades que supón a falta de acceso a Internet en prisión, o equipo da UNED Pontevedra soubo adaptarse con solucións creativas, entregando materiais de estudo directamente e organizando actividades presenciais que facilitan a aprendizaxe e o contacto coa universidade.
Un dos proxectos máis emblemáticos é o curso de música, inspirado na idea de que "un anaco de madeira non sabe que pode chegar a ser un violín". A través de materiais reciclados, os participantes descobren a forza da creatividade e a expresión emocional. Tamén destaca o curso de verán sobre dereitos humanos, que convida a reflexionar sobre temas tan esenciais como a saúde, o medio ambiente, a liberdade de expresión ou a vivenda digna.
Estas iniciativas son un exemplo de como a educación pode transformar vidas, mesmo en contextos de privación de liberdade.
A experiencia da UNED Pontevedra demostra que unha boa práctica universitaria pode inspirar a outros centros, compartirse e multiplicarse.