As once vivendas unifamiliares adosadas de protección autonómica que no seu día promoveu Gescomar no barrio de Valdecorvos afrontan a súa fase final despois de anos marcados por atrasos, incerteza e cambios na titularidade do proxecto.
Unha nova promotora fíxose cargo das obras, que se retomaron o pasado mes de febreiro, coa previsión de que poidan concluír durante este ano.
A iniciativa remóntase a 2018, cando os primeiros compradores asinaron os seus contratos dentro dunha cooperativa impulsada pola empresa Gescomar. O proxecto desenvolvíase sobre solo adquirido previamente á sociedade pública Xestur, nunha zona que entón comezaba a configurarse como área residencial. As obras arrincaron en 2020, en plena pandemia, coa previsión de que as vivendas estivesen listas no verán de 2022.
Nembargantes, o calendario non se cumpriu. Ás dificultades derivadas do contexto sanitario sumáronse problemas económicos e o encarecemento dos materiais de construción, agravado pola guerra en Ucraína. Esta situación elevou o custo estimado de cada vivenda desde os 188.000 euros iniciais até preto dos 200.000, sen que iso se traducira en avances significativos na execución.
O solo foi urbanizado por Xestur dentro do desenvolvemento global de Valdecorvos e vendido posteriormente para vivenda protexida de promoción privada. O Instituto Galego de Vivenda e Solo (IGVS) tratou de mediar cando xurdiron as primeiras dificultades, aínda que sen intervención directa na xestión da promotora nin no financiamento, que correspondía a unha entidade bancaria.
O proxecto quedou finalmente paralizado en 2023. Un ano despois, en 2024, o falecemento repentino do xerente de Gescomar, Pablo Díaz, supuxo un punto de inflexión definitivo para unha promoción que xa acumulaba importantes atrasos. Ante este escenario, a entidade financeira que apoiara a operación impulsou unha poxa notarial dos inmobles, celebrada o pasado mes de xaneiro.
O proceso de poxas partiu de cifras ao redor dos 45.000 euros e concluíu coa adxudicación por un valor moi por baixo das estimacións iniciais. Posteriormente, unha construtora con sede en Santiago asumiu a promoción e, tras avaliar o estado das edificacións, decidiu reactivar os traballos.
A incerteza e os atrasos levaron á maioría dos cooperativistas a abandonar o proxecto. Dos once compradores iniciais, unicamente tres continúan vinculados á promoción.
Agora os traballos volveron a activarse e o tres propietarios que permanecen no proxecto confían en que, esta vez si, as vivendas poidan entregarse nos próximos meses, poñendo fin a unha longa etapa de espera iniciada fai xa case oito anos.