O persoal de traballadores da limpeza do Hospital Provincial e de Montecelo levou a cabo este martes unha protesta polo despedimento por parte de Acciona dunha compañeira para esixir a súa inmediata readmisión.
A concentración produciuse de maneira simultánea ás portas dos dous centros hospitalarios da cidade, o Hospital Provincial e Montecelo, entre as 10 e as 10.30 horas.
A causa destas mobilizacións está en, segundo os traballadores, o despedimento dunha traballadora sen unha causa xustificada. Por iso convocaron protestas para este martes e o vindeiro xoves.
O presidente do comité de empresa de Acciona, Nicolás Sobrado; o secretario de organización de CCOO, José Luis García Pedrosa; e Diana Rodríguez, secretaria comarcal de CIG-Servizos, explicaban o pasado xoves que por primeira vez na historia das concesionarias da limpeza dos hospitais despídese a unha traballadora, que regresaba dunha baixa laboral, por "baixo rendemento, sen concretar as causas".
Os representantes sindicais entenden que detrás desta medida disciplinaria escóndese a intención por parte da empresa de "amedrentar" ao persoal para que evite as baixas.
"É unha represalia contra o persoal", explicaba Diana Rodríguez que lembra á empresa que conta con múltiples formas para regular as baixas xa que, ademais do médico de cabeceira, conta coa mutua e unha terceira empresa que realiza un seguimento. "É imposible coller unha baixa sen xustificar", sosteñen.