Xeral

Queixas veciñais polo abandono do estanque do Parque de Pasarón

Pontevedra

26 de agosto 2019

Actualizado: 16:57

PontevedraViva

Peixes mortos, auga cun ton de cor musgosa e un notable estado de falta de atención provocan que a veciñanza denuncien o mal efecto que provoca este espazo de lecer situado na rúa Luis Otero

Estanque do Parque de Pasarón / PontevedraViva

A veciñanza da contorna do Estadio Municipal de Pasarón mostrou o seu enfado, nas últimas horas, pola situación de abandono e suciedade que se observa no estanque do Parque de Pasarón.

Durante este domingo podíanse ver flotando nas augas deste recinto polo menos dous peixes mortos, ademais o ton da auga era dunha cor musgosa como consecuencia, segundo denuncian, dun mal estado de mantemento. A veciñanza reclama a intervención de operarios do Concello para a limpeza e coidado deste espazo de lecer.

Esta Parque de Pasarón atópase situado entre as rúas Luís Otero, Joaquín González e Praza de Pasarón e é utilizado por familias da contorna que levan a menores a xogar no parque infantil, situado a poucos metros do estanque.

RESPOSTA DO CONCELLO

Desde a concellería de Parques e Xardíns indican que este luns iniciouse a limpeza profunda do estanque do Parque de Pasarón. Desde o departamento que coordina o concelleiro socialista Iván Puentes indican que durante os vindeiros días os operarios van desenvolver eses traballos de limpeza, ademais do arranxo do sistema de circulación da auga que levaba moito tempo estragado.

Puentes sinala que o venres 23 iniciouse o achique da auga e foron retirándose os parrulos e peixes que se atopan no estanque. Indica que se algún apareceu morto na superficie debeuse a que saíu dos lodos do fondo da instalación. O resto de peixes, principalmente carpas, foi retirado en capachos para devolvelos ao estanque unha vez rematen os traballos.

Este luns iniciáronse os traballos máis profundos para retirar os fangos do fondo e a suciedade da cubeta. Tamén está previsto acometer o arranxo do sistema de circulación da auga coa intención de que entre en funcionamento a cascada, que permite que a auga se poida oxixenar e se reduza a podredume das augas, unha situación que, segundo explica o concelleiro, é inevitable debido á presenza de residuos dos animais e da comida.

Desde o Concello indican que está previsto levar a cabo diversas actuacións ao longo do mandato nos parques e xardíns, especialmente na zona de xogos infantís. Vai estudarse, neste sentido, realizar obras que permitan desaugar estas augas do estanque reducindo a presenza de lodos no fondo.

Engade Pontevedra Viva como fonte preferida de Google de balde

Mantente informado coas últimas noticias de actualidade.

Activar agora

Máis novidades