A partir deste luns 27 de outubro a recollida de aceite doméstico usado esténdese ao rural de Pontevedra.
Segundo informa o Concello, dentro do novo contrato de xestión de residuos, vanse a empezar a instalar nesa data colectores de recollida de aceite.
Lérez e Cerponzóns serán os primeiros lugares en contar con este servizo, que ao longo da semana chegará ao resto de parroquias, confirma o goberno local.
Coincidindo coa colocación destes primeiros colectores, na rotonda da igrexa de Lérez (10.00 horas) e no aparcadoiro da igrexa parroquial de Cerponzóns (10.30 horas), entregaranse funís aos veciños para facilitar a reciclaxe. No resto de lugares serán entregados a través das asociacións veciñais.
Explica o Concello que o procedemento para refugar correctamente o aceite doméstico usado é depositar botellas usadas de plástico de 1 ou 2 litros recheas de aceite e pechadas dentro do colector.
A falta de confirmar as localizacións definitivas en Ponte Sampaio e A Canicouva, estes colectores estarán instalados nos seguintes lugares:
- Lérez: Rotonda da igrexa
- Cerponzóns: Aparcadoiro igrexa
- Alba: Aparcadoiro igrexa
- Campañó: Local social de Cabaleiro
- Lourizán: Estribela e Praza dos Praceres
- Tomeza: Aparcadoiro igrexa
- Marcón: Aparcadoiro Casa da Cultura
- Salcedo: Contorna do restaurante A de Paco
- Verducido: Aparcadoiro igrexa
- Santa María de Xeve: En fronte do aparcadoiro da igrexa
- Santo André de Xeve: Parque infantil da Bouza
- Bora: Zona ITV
- Mourente: Cruzamento de entrada ao Casino Mercantil
Estes colectores complementan aos instalados xa no Mercado de Abastos, cunha xestión de recollida a cargo da cooperativa de traballo social Mulleres Colleiteiras, que asinou un convenio de colaboración coa empresa PreZero, responsable da xestión de residuos en Pontevedra.
"A extensión deste servizo ao rural é fundamental para facilitar a reciclaxe a toda a cidadanía e para fortalecer o noso compromiso social e ambiental, en liña coa campaña 'Responsábeis' recentemente presentada polo Concello e que marca a nosa acción de goberno", explicou respecto diso a concelleira María Xosé Abilleira.