O Concello de Caldas de Reis informa que a nova oficina provisional de información turística, situada na rúa Real, está a pleno rendemento e multiplicou por seis a atención a visitantes nos seus primeiros dez días de funcionamento.
Segundo indica o tenente de alcalde, Manuel Fariña, esta cifra evidencia dous aspectos importantes: que "Caldas está de moda" e que a elección do novo espazo para as instalacións de atención ao turismo "é un acerto", pois é un punto de encontro para a maioría das persoas que visitan a vila termal.
Os datos proporcionados polo departamento de Turismo indican que en algo máis dunha semana o número de visitas na rúa Real superou ás consultas do pasado mes de xullo no anterior emprazamento. "Sabiamos que o cambio provisional da oficina dende a Tafona á rúa Real ía ser moi positivo e as cifras están a avalar a nosa decisión, incluso superan as expectativas ", destaca Fariña.
A análise do perfil dos visitantes que acoden á oficina revela que a maioría son peregrinas, cunha proporción de 70-30 en relación a turistas en xeral. Entre as peregrinas, un 60% son de procedencia estatal e o 40% son internacionais.
En canto á procedencia dos visitantes estatais, a maioría chegan dende Madrid e Andalucía. Tamén con presenza de procedentes de Cataluña, da Comunidade Valenciana e do País Vasco.
En canto ao turismo internacional, a maioría procede de Portugal, Francia e Alemaña.
As solicitudes de información son principalmente sobre a propia vila de Caldas e a súa contorna, manifestando tamén un interese xeral polas Rías Baixas e o Barbanza.
Engade Pontevedra Viva como fonte preferida de Google de balde
Mantente informado coas últimas noticias de actualidade.