Ao redor de corenta axentes da Policía Local de Pontevedra con camiseta azul e unha pancarta reivindicativa asistían ao pleno municipal deste mes de setembro, do mesmo xeito que veñen realizando durante as últimas sesións da corporación. Na entrada ao Teatro Principal, o concelleiro de Persoal Vicente García Legísima mantivo un encontro cun dos representantes sindicais da Policía, Antonio Millares, indicándolle que o luns se abrirá a mesa de negociación cos funcionarios.
A apertura desta mesa de negociación non convence aos delegados sindicais. Entenden que é preciso resolver antes unha solución ao problema que manteñen coa Policía Local. E rexeitan que o goberno local contrate un estudo para axustar os salarios dos funcionarios xa que entenden que non se terá en conta a situación dos axentes, que reclaman que cobren a mesma cantidade que outros funcionarios do mesmo grupo. "Meterse nun estudo cando non arranxaches un problema sectorial vai a envenenar o resto da negociación", apuntan os representantes sindicais.
"A xente está a cabrearse cada vez máis", indica Antonio Millares. O martes 4, a Policía Local celebrará unha nova asemblea na que estudarán os próximos actos de protesta e as medidas que adoptarán. O delegado de Comisións Obreiras convida o concelleiro de Persoal a que acuda ante os axentes e aclare cal é a súa posición en relación ás reivindicacións policiais. "Queremos que vaia a unha asemblea e que diga que non é xusto. Pero non o di", conclúe Millares.