O Concello de Marín continúa coas obras de transformación da Avenida de Ourense, un proxecto que busca mellorar a mobilidade e a calidade de vida na principal arteria do municipio, segundo indican desde o goberno local.
A próxima fase do plan inclúe a construción dunha rotonda fronte ao estaleiro de Nodosa, unha intervención que axudará a regular o tráfico nesta zona, moi transitada a diario.
A execución desta infraestrutura obrigará a retirar algunhas árbores situadas na illa urbana que ocupará a futura rotonda, nas proximidades da Biblioteca.
Segundo explicou a alcaldesa, María Ramallo, o Concello estudou varias alternativas técnicas para evitar a retirada das árbores, pero ningunha resultou viable. "Analizamos opcións como modificar o trazado da beirarrúa ou da rotonda, pero estas solucións implicaban perder case por completo o paseo continuo na beira pegada ao Porto. Iso non tiña sentido, especialmente despois de humanizar esta zona con fondos europeos de Marín Dusi", sinalou Ramallo.
A decisión de retirar as árbores débese a que a construción da rotonda afectaría ás súas raíces, dificultando o seu rego e estabilidade. Isto aumentaría o risco de que secasen e se convertesen nun perigo pola falta de agarre.
Está previsto preservar as árbores no tramo entre o Concello e a Biblioteca, agás un exemplar que caeu durante un dos recentes temporais.
A alcaldesa recoñeceu que "é unha pena perder esas árbores, pero estamos convencidos de que a rotonda suporá unha mellora importante na mobilidade da Avenida de Ourense, que soporta un volume moi alto de tráfico diariamente".
Ademais, o proxecto financiado polo Ministerio non inclúe a instalación de novo mobiliario urbano nin elementos vexetais. Por iso, o Concello está a preparar unha partida específica de fondos propios para dotar a rúa de bancos, xardineiras e parterres.
O obxectivo é naturalizar o espazo, que gaña en anchura e comodidade para o paso peonil, e crear zonas verdes que melloren a contorna.