O xoves 28 de agosto vai organizarse unha ruta sonora polas históricas Salinas de Ulló no Concello de Vilaboa baixo o lema "Descobre os sons das salinas!".
A actividade, completamente gratuíta e dirixida a toda a familia, comezará ás 10:00 horas na entrada das Salinas.
A iniciativa céntrase nunha experiencia sensorial única onde as persoas participantes terán a oportunidade de escoitar os sons da avifauna local, os murmurios do vento entre as salinas e coñecer as historias e tradicións do patrimonio marítimo local, todo nun marco de paisaxes espectaculares.
Para participar nesta "experiencia única onde os sons da natureza e a tradición salineira se unen nunha ruta inesquecible", as persoas interesadas deben reservar praza chamando ao teléfono 986 31 37 61, xa que o número de participantes é limitado.
A ruta permitirá descubrir o complexo das Salinas de Ulló, que deixou de fabricar sal a principios da década de 1720 e que conta con dous grandes estanques rectangulares contiguos construídos aproveitando unha enseada natural do fondo da ría.
Os participantes coñecerán como funcionaba o proceso tradicional de extracción de sal, onde a auga permanecía estancada durante uns 30 días ata alcanzar os 18 graos para permitir a precristalización.
A visita tamén incluirá os restos da Granxa das Salinas, situada ao sur do Val do Ulló, que conserva unha singular capela central e unha monumental lareira labrada en perpiaño granítico de primeira calidade, xunto aos restos doutra casa que albergaba os caseiros da finca.
Esta actividade está promovida polo Concello de Vilaboa, en colaboración con AFAMO, a Xunta de Galicia-Consellería do Mar e os Grupos GALP Ría de Vigo-A Guarda.