Se para calquera cidadán romper a súa rutina e ter que cumprir un confinamento resulta duro, para as persoas con TEA (Trastorno do Espectro Autista) a tesitura aínda se fai máis complicada. Primeiro porque nalgúns casos non poden comprender que esta sucedendo, segundo porque alterar os seus hábitos aféctalles física e psicoloxicamente en maior medida e terceiro porque o confinamento tamén ten maiores consecuencias.
Por este motivo, a pesar de que o primeiro Real Decreto Lei do Goberno non contemplaba as súas especificidades, as solicitudes das entidades que traballan con este colectivo supuxeron a publicación dunha Orde que lles permite saír á rúa acompañados. En Galicia, segundo as fontes consultadas, este permiso non derivou en comportamentos non empáticos, como si sucedeu noutros lugares.
Asociacións como APACAF, a Asociación de Pais de Centros de Apoio Familiar para Autismo, con centros en Moraña e A Estrada, tiveron que cancelar o servizo de centro de día, do mesmo xeito que o servizo de lecer e tempo libre. A súa actividade céntrase agora en atender ás dez persoas residentes todo o ano en A Braña, onde procederon ao seu illamento e suspensión de visitas externas. Alí traballan vinte persoas. María García, directora xerente de APACAF, manda unha mensaxe de tranquilidade ás familias e fai outra chamada ás administracións para que lles envíen material profiláctico á vez que agradece algunha doazón recibida.
Autismo BATA
Outro colectivo que traballa con persoas con TEA é Autismo Bata, en Vilagarcía. Aplicaron un ERTE ao persoal da unidade ambulatoria que atende a 90 familias, o centro educativo continúa mediante sistema telemático, e as tres vivendas tuteladas nas que residen dezaoito persoas. Case todo o que está a facer agora é prevención, sinalan.
Unha delas é Carlos, que durante a fin de semana volve a casa cos seus pais. Irasema Ponte, a súa nai, bota en falta máis axudas por partes das administracións, tanto para as persoas con autismo como para as súas familias. "Deberían contemplar xubilacións anticipadas para casos como os nosos" reclama esta pontevedresa que convive co TEA desde hai vinte e oito anos.
Mario Trigo, presidente de Autismo BATA, aconsella ás familias que "se trate na medida do posible de normalizar a situación, o importante é transmitir calma, evitar que perciban inquietude e levar unha rutina que poidan facer para que non noten o cambio. No caso de que poidan entender esta situación, utilizar apoios visuais, que ademais estes días están a facilitarse moitos".
Este 2 de abril conmemórase o Día Mundial de Concienciación do Autismo. A actividades de visibilización levarán nesta ocasión ás redes sociais en boa medida ante a imposibilidade de facelo como en anos anteriores. Todos coinciden no rexeitamento á colocación de lazos azuis que os identifiquen durante as súas saídas á rúa, como propuxeran desde algún sector.