Ao mesmo tempo que continúan os labores de procura dos desaparecidos no naufraxio do Villa de Pitanxo, as autoridades comezaron a investigar que puido ocorrer para que este barco afundise nas augas de Terranova (Canadá).
Por agora, todo son hipóteses. A falta de coñecer a versión que ofrezan os tres sobreviventes e, pendentes de que se poida recuperar a caixa azul do barco, todo apunta que as "malas condicións" nas que se atopaba o mar puido provocar esta traxedia marítima.
O presidente da Xunta, tras participar nun 'gabinete de crise' que se reuniu na sede da Autoridade Portuaria de Marín, lembrou que o Villa de Pitanxo é "un gran barco" que acabou afundíndose nas xélidas augas de Terranova.
As condicións que tivo que atravesar o arrastreiro galego debían ser "absolutamente adversas", segundo Alberto Núñez Feijóo, que engadiu que tripulación é "gente profesional que sabía navegar" e que son "buenos patrones y excelentes marineros".
"Tuvo que ser una situación de mar muy complicada", reiterou o presidente galego.
Feijóo destacou ademais que desde 1978 Galicia "no había tenido un siniestro en el mar como este" e, aínda que recoñeceu que o consolo "es imposible" para as familias, quixo reiterar a súa "solidariedad" con eles e cásaa armadora.
"Son sus familiares, sus compañeros o sus trabajadores y todos ellos están destrozados como se pueden imaginar", afirmou o presidente.
O Villa de Pitanxo, un arrastreiro conxelador construído en 2004 no desaparecido estaleiro vigués M. Cíes por encargo do armador Manuel Nores e dedicado á captura de fletán negro, levaba 24 tripulantes a bordo.
Deles, dez faleceron, tres foron rescatados con vida e once continúan desaparecidos.
Das 24 persoas que traballaban no pesqueiro no momento do afundimento, 16 teñen nacionalidade española, cinco son peruanos e tres ganeses, de acordo aos datos oficiais.
RETÓMASE A PROCURA
Desde o centro de coordinación de rescate con base en Halifax (Canadá), informaron que as tarefas de procura dos mariñeiros desaparecidos continuará este mércores a pesar das adversas condicións meteorolóxicas.
Na zona de rastrexo hai ondas duns dez metros de altura, con ventos de ata 85 quilómetros por hora e unha visibilidade de seis quilómetros, o que dificulta o operativo de rescate.