Un grupo de traballadores de Cespa-Ferrovial, a empresa concesionaria do servizo de limpeza de Pontevedra, concentrábase durante o mediodía deste xoves 3 ante a sede da entidade situada na rúa Andrés Muruais portando unha pancarta e facendo soar chifres. Reclaman que se retomen as negociacións do convenio colectivo, que romperon a principios do mes de setembro pasado.
Juan Carlos Corredoira, presidente do comité de empresa de Cespa-Ferrovial, sinalou que a diferenza fundamental coa patronal é económica. O persoal denuncia que leva tres anos co salario conxelado e reclaman unha subida de 2,75 mentres que a dirección da empresa só está disposta a ofrecer un 0,5.
Os representantes sindicais alertan de que se non se retoman as negociacións están dispostos a convocar unha folga. En principio, teñen prevista unha nova concentración o 3 de decembro se non se producen avances.
Por outra banda, o contrato de CESPA-Ferrovial finaliza en xuño de 2017 e o persoal mostra a súa preocupación sobre as condicións nas que sairá a concesión que realice o goberno local para o novo contrato de recollida de lixo, debido ao cambio de sistema que supoñerá a posta en marcha da compostaxe. Segundo afirma Juan Carlos Corredoira espera que todo o persoal actual sexa toda subrogada tal e como se contempla na cláusula actual. nela figura que todos os traballadores que conten cun mínimo de 6 meses de contrato na empresa terán que seguir en caso de cambio na concesión.
Actualmente, a empresa conta con 125 traballadores e fontes sindicais apuntan que desde hai 18 anos mantense o mesmo número de operarios.