O Partido Popular impugnou a convocatoria do Pleno Municipal Extraordinario do próximo venres 23 de decembro no que se debaterá o orzamento elaborado polo goberno local ante a negativa para debater as emendas expostas pola oposición.
"Se nos quiere vetar el derecho a votar las enmiendas", asegura Jacobo Moreira, que ademais critica "el alcance que se le quiere dar a la votación", sinalou o portavoz do PP en relación á moción de confianza que ten previsto expor o alcalde, Miguel Anxo Fernández Lores.
A pesar da situación, Moreira matizou a súa oferta de negociación ao goberno municipal ao asegurar que "con que nos acepte una sóla de nuestras propuestas", que pasan por unha baixa do IBI, o PXOM ou o Plan de Transporte Metropolitano, "estamos dispuestos a facilitar que salga adelante el presupuesto".
Ante as acusacións de falta de diálogo, o alcalde defende que "levamos máis de dous meses negociando" e que "se negociou cos grupos, cos veciños e con asociacións", aceptando algunhas das súas propostas. De feito Fernández Lores sinalou que modificaron aspectos en dúas das tres emendas que defende o PP, como plantexar unha rebaixa no imposto de recollida de lixos ou "ampliamos a partida para o transporte metropolitano".
Por ese motivo, aínda que "seguimos abertos a calquera negociación", o rexedor da capital defende a postura do goberno e a opción de poñer encima da mesa unha moción de confianza, un dereito que "a lei permite" e para a que "non cabe recurso".
Para Fernández Lores aceptar as emendas da oposición supón "obstruír un goberno lexítimo" e pode derivar, por exemplo, en "que non se faga a Feira Franca, o Surfing The Lérez ou que non se fagan os concertos da Peregrina, porque se reducen cartos de festas".
Ademais, en relación ao "efecto contaxio" que teme que se produza o alcalde de Santiago, Martiño Noriega, e que podería levar ao BNG para dificultar aprobación das contas na capital galega, Lores pecha esa posibilidade ao asegurar que "o BNG non vai pactar co PP para impedir ningún goberno en Galicia", algo que podería suceder en Pontevedra o venres se se confirman os votos en contra de toda a oposición e ao non optar algún deses partidos pola abstención.