Fin ao período de descanso nas obras urbanas da cidade de Pontevedra, que se ordenara para facilitar a mobilidade durante as datas do Nadal.
O Concello deu orde ás empresas de construción que executan proxectos na cidade de retomar a súa actividade a partir do luns 12 de xaneiro.
Desta forma continuaranse obras como a reparación da Avenida de Marín, o desdobramento da Avenida de Vigo ou as melloras previstas na Praza de Ourense ou no Camiño da Vía, na Seca.
A próxima semana tamén iniciaranse novas obras no espazo urbano, como a mellora da accesibilidade en Domingo Fontán, a pavimentación da Avenida de Uruguai e González Besada ou a eliminación de barreiras entre as rúas Pastor Díaz, Riestra e Oliva.
No caso da Avenida de Uruguai, ademais do asfaltado proxectado iniciarase a retirada de semáforos prevista en varios pasos de peóns, nos que ademais se eliminarán barreiras arquitectónicas.