Trump, un cabaret papal, un 'MasterChef' para bebés e unhas aloucadas galerías triunfan na Mostra da Parodia

Con moita retranca, diversión e certas doses de surrealismo. Así viviu Pontevedra unha das principais citas do seu Entroido, a Mostra da Parodia.

Oito agrupacións participaron na edición número 29 deste certame que volveu encher de cor e risas algúns dos principais espazos do centro histórico.

Os grandes triunfadores da velada foron os membros de Os das Pistas, que coa súa parodia do peche das Galerías da Oliva, foron os favoritos do xurado.

Seus foron os 1.300 euros do primeiro premio e o Ravachol de prata.

A súa proposta, situada enfronte de Casa Alcalde, foi unha das máis aplaudidas polos centos de pontevedreses que non dubidaron en visitar as oito parodias participantes.

Os dous segundos premios, dotados con 1.000 euros, foron para o desfile das forzas armadas -ao que non faltou Trump- que a agrupación Parodia PTV protagonizou ante o Liceo Casino, e para o Masterchef para bebés de Os do Val do Lérez na Praza da Peregrina.

O 'touro vacilón' de Equipo Ja -Praza de Ourense-, os bolos humanos, ao máis puro estilo Grand Prix, de Vamos a todo -Praza da Ferrería- e o conclave papal e cabaretero de Cor Café -Curros Enríquez- compartiron o terceiro premio e levaron 700 euros.

Esta Mostra da Parodia completouse, co particular furancho de Las Flores del Carnaval na Praza da Ferrería e con Contos de Galerna, unha parodia dos tradicionais cantos de taberna, nas escaleiras do Principal.

A última hora, por motivos loxísticos, faltaron os membros de Os da Caña.