Seis actuacións que, no seu conxunto, supoñerá un investimento de tres millóns de euros. É o paquete de obras que ultima o Concello en seis parroquias do rural, tras a recente incorporación ao orzamento municipal de case quince millóns de euros máis.
A primeira delas será a que se execute nos núcleos de Rial, Rorís, Méan e Liñares, en Lourizán. Trátase dunha obra que, no seu día, quedou inacabada pola quebra da construtora Nexia e que, de acordo cos veciños, verá ampliado o seu radio de acción.
O investimento pasará de 184.000 a 455.000 euros. Renovarase o pavimento destas zonas e, ademais, executarase a recollida de pluviais, instalaranse novas canalizacións e acometerase o pintado e sinalizado dos viais.
Ademais, en Liñares ampliarase o ancho do vial, que nalgúns tramos é menor aos 4 metros, pasando ata os 6,5 metros, reforzando os muros que sosteñen o terreo.
Pola súa banda, 564.000 euros serán para arrombar a conexión da PO-532 co núcleo da Peralba, en Marcón. O proxecto permitirá cambiar o pavimento e o sistema de recollida de augas ao longo duns dous quilómetros. Haberá tamén medidas de acougado de tráfico.
A ponte que atravesa este vial será o punto máis complexo desta actuación, xa que haberá que colocar novos módulos. Os actuais non se atopan en boas condicións.
Esta obra sumarase a tres actuacións anteriores, valoradas nuns 320.000 euros, para executar o saneamento interior da Peralba, a pavimentación de todo o núcleo e a instalación de alumado LED. Nesta zona hai unhas 25 vivendas.
A estes dous proxectos, que sairán xa a licitación, o Concello sumará outros catro cuxos detalles están a ultimar os técnicos municipais.
Serán actuacións en Carballiños e Ferreiro (Campañó), Cacheiro (A Canicouva), Pazo e Carabelo (Mourente) e Ramallás (Lérez), que se presentarán en próximas semanas.