A última hora da tarde deste domingo 11 rexistrábase unha colisión entre dous turismos na Avenida da Costa, na parroquia de Combarro, no municipio de Poio.
Segundo informa a Policía Local, debido ao impaco un dos vehículos saía da vía e precipitábase polo desnivel con perigo de caer en dirección á edificación dun almacén situada debaixo, na Avenida Regalado.
O condutor do vehículo que caeu de forma vertical quedou atrapado ata que foi posible liberalo. O home non sufría lesións, mentres que o condutor do outro turismo implicado na colisión si sufría feridas leves.
O único ocupante do vehículo implicado saíu polo portón traseiro coa axuda dos membros dos Bombeiros e do GES de Sanxenxo, pero sen que fose necesario aplicar os equipos de excarceración, segundo informa o servizo do 112 Galicia.
Segundo as mesmas fontes, colaboraron os Bombeiros do Parque de Pontevedra, que tiveron que cortar o quitamedos para acceder ao coche; integrantes de Protección Civil de Poio; e o GES de Sanxenxo e efectivos do 061.
Investíganse as causas que provocaron o accidente. As probas de substancias estupefacientes ofreceron resultado negativo.