A área sanitaria Pontevedra-O Salnés alcanza xa as 73 vítimas mortais desde o inicio da pandemia do coronavirus. Este venres perdía a vida unha muller de 70 anos de idade no Hospital de Pontevedra. É toda a información facilitada pola Consellería de Sanidade.
Os centros hospitalarios desta zona non rexistraran vítimas mortais durante as últimas dúas xornadas, despois dun refacho dunha semana na que había polo menos un falecemento diario.
Neste venres faleceron en Galicia, ademais da muller de Pontevedra, outra muller de 84 anos no Hospital Álvaro Cunqueiro de Vigo, procedía da Residencia Vila do Conde de Gondomar; un home de 91 anos, no Complexo Hospitalario Universitario de Ourense e unha muller de 104 anos, que perdía a vida na residencia San Antonio de Beariz, en Ourense.
Todas as vítimas rexistradas nesta xornada contaban, segundo os datos facilitados polo Servizo Galego de Saúde, con enfermidades previas. Con estas novas mortes, o número de falecidos na comunidade autónoma ascende a 1.336 persoas desde que se comezou a contabilizar as vítimas por esta enfermidade.