Unha vez que practicamente está terminado o programa para dotar de centros sociais ao rural pontevedrés, o goberno municipal está disposto a dar un "paso adiante" para seguir mellorando os equipamentos das parroquias. Segundo avanzou este venres o concelleiro Demetrio Gómez Junquera, o próximo obxectivo será planear, de forma consensuada cos veciños, unha ampla rede municipal de instalacións deportivas.
O primeiro paso, avanzou, serán os campos de herba sintética. Ademais do de Marcón, que xa está en funcionamento, o Concello espera concluír o actual mandato con outros cinco campos destas características, avaliando a situación dos existentes e a posible necesidade de construír algún novo. Estarían situados en Campañó, Cerponzóns, Santa María de Xeve, Salcedo e Ponte Sampaio.
Planificaranse en base a tres criterios. Estas instalacións non serán de uso exclusivo dunha única parroquia, todas terán perspectiva municipal de forma que poidan ser empregados por calquera cidadán de Pontevedra e deberán contribuír para avanzar no fortalecemento dos novos de centralidade das parroquias nos que se sitúen.
Os trámites máis avanzados, segundo o coordinador do Rural no goberno municipal, son os de Campañó e Cerponzóns, onde o Concello está xa en conversacións coas respecticas comunidades de montes para a cesión dos campos de fútbol actuais; ou en Salcedo, onde o equipo de fútbol está a buscar terreos -preto do pavillón- para a construción dun campo alternativo ao actual, que presenta unha serie de problemas urbanísticos.
Pola súa banda, o campo de Gatomorto (Santa María de Xeve) xa é de propiedade municipal e estase negociando cos promotores da súa recuperación para que sexa unha instalación que dea servizo aos dous Xeves e Verducido. En todo caso, o cuantioso investimento necesario para a súa rehabilitación é o principal escollo que presenta este campo.
Ademais, o Concello está pendente de aclarar a situación do campo de fútbol de Ponte Sampaio por parte de Costas, xa que está situado en dominio público e a actuación que se podería realizar nel sería "máis branda" que o resto. Fóra deste plan, polo menos polo momento, quedaría o de Praceres, cuxa continuidade está ligada ao futuro do complexo industrial de Lourizán, ao estar afectado pola mesma caducidade da concesión.
Con todos estes campos, o salto cualitativo neste tipo de instalacións en Pontevedra "sería espectacular", segundo Demetrio Gómez Junquera. Xunto a iso, dixo, está a estudarse unha serie de actuacións nos actuais pavillóns deportivos "mirando cales son as súas necesidades" e, a partir de aí, "veremos de actuar nuns ou noutros".