Soutomaior xa goza do programa municipal Verán Activo 2026, unha iniciativa que ofrece unha gran programación de actividades para todas as idades ao longo dos meses de xullo e agosto.
E é que as primeiras actividades xa están en marcha tras a boa acollida da convocatoria por parte dos veciños do municipio. Un dos puntos fortes deste programa é que vai dirixido a persoas de todas as idades, desde os máis pequenos até os maiores de 60 anos.
Esta iniciativa inclúe actividades que combinan deporte, natureza, convivencia, creatividade e hábitos de vida saudable. O alcalde de Soutomaior, Manu Lorenzo, defínea como "unha aposta por un verán vivo, no que a veciñanza poida compartir tempo de calidade e facer actividade física".
Os máis novos poden gozar de deportes con rede, lecer deportivo, andainas, bailes deportivos e mesmo actividades de aventura na contorna natural da localidade. Tamén hai un espazo dirixido aos maiores de 60 anos con actividades enfocadas no envellecemento activo e no benestar integral.
Para o concelleiro de Deportes, Gonzalo Outeiro, un dos puntos fortes do Verán Activo 2026 reside na oferta dunha programación diversa e adaptada a todos os intereses da cidadanía.
Outro dos aspectos a destacar é o apartado dirixido ás familias. Certas actividades como Mércores en familia, Os venres hai tema, festas de espuma ou xornadas con inchables están pensadas para o goce e a convivencia entre diferentes xeracións.
Tamén hai espazo para os campamentos tématicos, que arrincan este domingo 12 de xullo coa inmersión na natureza como principal atractivo. Uns 50 mozos participarán nesta cita que se celebrará en Valverde (Cáceres).
Co fin de garantir a igualdade de oportunidades, este programa municipal tamén inclúe actividades adaptadas nunha aposta polo lecer inclusivo. Destaca, por exemplo, o Movemento Inclusivo que se celebrará o 15 de xullo e que ofrecerá os apoios necesarios para aquelas persoas que os necesiten.
Aínda quedan prazas libres en numerosas actividades, polo que desde o Concello animan a toda a cidadanía a consultar a programación a través da páxina web municipal para participar nun verán de convivencia, encontro e aventura.
Engade Pontevedra Viva como fonte preferida de Google de balde
Mantente informado coas últimas noticias de actualidade.