Decenas de persoas foron fieis á cita cunha das tradicións máis arraigadas no barrio da Moureira e a contorna de San Roque, a procesión do Viático.
O bo tempo animou a asistencia á cita relixiosa, que a parroquia de Santa María e o Gremio de Mareantes manteñen viva desde o século XV.
Como marca a tradición, a procesión saíu ao termo da misa solemne do dez da mañá na basílica de Santa Maria e trasladouse até San Roque para levar a comuñón a tres persoas da parroquia que por dificultades de mobilidade non podían desprazarse para tomala no templo.
Fieis á tradición, a procesión percorreu as alfombras florais elaboradas polos veciños da zona durante a noite anterior, que dan vistosidade ao traxecto.
Como é habitual, tampouco faltaron á cita representantes da brigada Galicia VII, Brilat, e da Escola Naval de Marín.