Vilaboa sumouse aos actos polo 25 de novembro, día internacional da eliminación da violencia contra as mulleres, cunha concentración que se celebrou diante da casa consistorial e na que os asistentes mostraron o seu "firme compromiso" para rexeitar a violencia de xénero.
O manifesto da corporación municipal, lido polo alcalde Francisco Costa, recolle a convicción de que a "tolerancia cero" coa violencia contra as mulleres "debe ser un valor" e como tal ten que ser defendido pola sociedade no seu conxunto.
"Unha sociedade decente esixe avanzar cara a unha sociedade segura e libre de violencia de xénero, que garanta unha resposta efectiva ás mulleres que sofren violencia, así como aos seus fillos e fillas, xerando e ofrecendo os mecanismos necesarios para conseguilo", explicou o rexedor de Vilaboa.
O alcalde, en nome de toda a veciñanza, reclamou dotar "suficientemente" as partidas orzamentarias para loitar contra a violencia machista e pediu crear un fondo específico de apoio aos concellos para dar reforzo á rede de servizos públicos, impulsando o papel que desempeñan os servizos sociais municipais e os centros da muller.
A este respecto, Francisco Costa falou da importancia de que a xustiza teña os recursos suficientes para combater esta lacra e de que a educación ofreza unha formación integral e específica en igualdade, educación afectivo-sexual e de prevención da violencia de xénero.
A concentración rematou cun minuto de silencio por todas as vítimas mortais da violencia de xénero que, segundo lembrou o alcalde, "son mulleres con nomes e apelidos, cunha vida por diante que se foi truncada por unha violencia cruel exercida, precisamente, pola persoa coa que un día decidiron compartir a súa vida".