Vilalonga estreará este ano unha completa Aldea do Nadal con nove días de actividades pensadas para todos os públicos e cun marcado carácter solidario.
A programación foi presentada este venres na Praza Pública e está organizada pola Asociación Cultural Os Cruceiros de Vilalonga, Mulleres Rurais A Candelaria, a Comisión de Festas de Gondar e o Vilalonga FC, baixo unha gran carpa financiada polo Concello.
Toda a recadación obtida durante o evento destinarase integramente a Xandre, un neno do Grove que padece unha enfermidade rara de carácter neurolóxico que afecta á sustancia branca do cerebro e compromete o seu desenvolvemento psicomotor e cognitivo.
A Aldea abrirá o 5 de decembro ás 21:00 horas co pregón a cargo de Abelardo Martínez, o Poli Paco, acompañado de chocolate quente e música en directo con Os Firrás.
O sábado 6, ás 17:30 horas, celebrarase unha gran Pandeiretada coa participación de Os Cruceiros de Vilalonga, Mulleres Rurais A Candelaria, Adro Vello do Grove, Pandeiretas Breogán, Cinco en Zocas e Os Gatiños de Portonovo. Ese mesmo día, pola mañá e pola tarde, disputarase un triangular de fútbol en categorías cadete e xuvenil.
O domingo 7, a xornada comezará ás 11:00 horas cunha andaina solidaria, sorteos, un mercadillo, sesión vermú e a actuación musical de Dani Kölmel.
Xa o venres 12, ás 16:30 horas, terá lugar un Encontro de Labores, mentres que o domingo 14 celebrarase a tradicional carreira San Silvestre, ás 11:30 horas.
O sábado 20, Papá Noel chegará á Aldea do Nadal ás 17:00 horas. Ese día tamén se organizará a iniciativa solidaria "Un Chocolatiño Quente?", destinada a recadar fondos para Cáritas e o Banco de Alimentos Rías Baixas, aínda que a carpa funcionará durante todo o evento como punto fixo de recollida de alimentos.
O 27 de decembro será a quenda de dous novos torneos de fútbol, en categorías biberón e veteranos.
Para dar a benvida ao novo ano, os días 2 e 3 de xaneiro, desde as 16:30 horas, os máis pequenos poderán participar nun obradoiro de galletas do Nadal.
A carpa contará cun canón de calor, o que permitirá celebrar todas as actividades nun ambiente cómodo e resgardado.