David Regades, delegado da Zona Franca de Vigo, e Gregorio Agís, concelleiro de Promoción Económica e Urbanismo de Poio, mantiveron un encontro este luns 3 de abril coa intención de poñer en marcha o polígono empresarial de Fragamoreira.
O organismo estatal ofrece os servizos técnicos do Consorcio ao dispor do Concello de Poio para realizar un estudo que indique a viabilidade desta zona para a implantación de empresas. A intención é realizar investimentos ben planificados para crear un espazo industrial ben ordenado, equipado coas dotacións necesarias e perfectamente comunicado.
Gregorio Agís explicou que Fragamoreira conta con todas as condicións para ser un polígono industrial de primeiro nivel e entende que se acadan a transferencia de solo e do proxecto, coa axuda de Zona Franca vai desenvolverse o parque empresarial en tempo récord ao estar realizado todo o traballo relacionado coa urbanización, sectorización e tramitación.
Sinala que tras solicitar durante os últimos anos en varias ocasións o desenvolvemento do polígono a Xestur e mesmo o cambio de titularidade permanecen sen resposta por parte do organismo da Xunta de Galicia.
Neste mes de abril vai levarse a pleno unha moción do PSOE e de Avante Poio para solicitar a Xestur que se transfira o proxecto e os terreos ao Concello, coa intención de que se poida impulsar todo o proxecto "a través do Estado", unha fórmula similar á utilizada na tramitación da construción da nova EDAR de Paxariñas.