![](/web/cache/scene/uploads/fotos/foto/95b/_S7QytKoutjK3UsovKMnMzytWsi62MgJyq/Lzc52L8gt0zCwMdI_/_wNDHSSU/NKUot0SvILlKxrAQ==_/65d742fc4c-imagem-whatsapp-2024-02-21-as-20.53.15_c9513763.jpg)
© Concello de Soutomaior
Soutomaior segue facilitando o acceso á lectura co proxecto Bibliofogar
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
O Concello de Soutomaior mantén un ano máis o proxecto Bibliofogar co que se pretende facilitar o acceso á lectura para aquelas persoas do municipio que teñan dificultades de mobilidade ou que por diversas circunstancias non poidan achegarse á biblioteca.
Trátase dun servizo que presta a biblioteca municipal Luis Seoane desde 2021. Bibliofogar conta cunha furgoneta equipada con acceso a internet, computador, mobiliario e material da biblioteca, que se despraza ata os domicilios, centros de maiores ou locais veciñais.
Así, ademais de chegar aos domicilios das persoas interesadas, está a prestarse servizo nos centros de día Soutomaiores, Boas Apertas e ao Centro Cultural Val-Sobral. Previamente aos desprazamentos analízanse os libros que poden resultar de interese para estes usuarios e seleccionan as súas demandas.
A concelleira de Cultura, Silvia Cernadas, sinalaba durante a reunión que mantiña con asociacións culturais e veciñais de Soutomaior que este servizo "duplicou o ano pasado o número de libros prestados respecto a 2022, pero queremos seguir ampliando o medio centenar de persoas usuarias e levalo a máis barrios do concello, sobre todo en relación á parroquia de Soutomaior, onde a poboación está moito máis dispersa e onde hai un gran número de maiores".