Detido por roubar cable de cobre en repetidores de telefonía de Ponte Caldelas
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Un home de 57 anos foi detido pola Garda Civil pola súa relación con ata 23 roubos con forza en repetidores de telefonía e outros 13 furtos nas liñas do cableado telefónico, todos eles cometidos en doce municipios de Pontevedra.
Os feitos que se lle imputan a este veciño de Ponteareas, que ten multitude de antecedentes policiais por feitos similares, foron entre setembro e novembro de 2023.
Todos eles tiveron lugar nos municipios de Ponteareas, Arbo, Crecente, Salvaterra do Miño, Mos, Gondomar, Vigo, Nigrán, Ponte Caldelas, As Neves, Fornelos de Montes e Pazos de Borbén, provocando que a Garda Civil activase a operación "Wifi.Tui".
A primeira denuncia presentouse o 26 de setembro por parte dunha empresa dedicada ao establecemento, explotación, mantemento e xestión de infraestruturas pasivas de telecomunicacións móbiles, que alertaba de que sufriran un roubo de cable.
A partir de aí, fóronse sucedendo as alertas por feitos similares en distintas instalacións de telecomunicacións, entre elas antenas de telefonía, pola zona sur de Pontevedra.
A investigación da Garda Civil permitiu identificar ao presunto autor destes delitos, que pasou a disposición xudicial do xulgado de instrución número 2 de Ponteareas.