Soutomaior aproba o plan de tráfico para a Festa da Ostra
Por Redacción
O goberno local do Concello de Soutomaior deseñou o plan de tráfico e seguridade da XXXVI edición da Festa da Ostra, que terá lugar os días 5, 6 e 7 de abril.
O plan, configurado pola Policía Local de Soutomaior, ten por obxectivo garantir a seguridade viaria das 30.000 persoas que se estima que virán durante os días que dura a festa. Ao tempo, o plan tamén permitirá minimizar os efectos negativos dos cortes de tráfico para os residentes da zona do Peirao.
O goberno de Soutomaior difundiu nas súas redes sociais o plan de tráfico e seguridade para que a veciñanza o poida consultar. Ademais, tamén se repartirán copias polos establecementos do comercio local para que todo o mundo teña acceso ao documento informativo.
Durante os tres días que dure a Festa da Ostra estará establecida unha zona con acceso preferente a pé, que irá desde o aparcadoiro da estación de tren de Arcade e a rúa Forneira ata a área recreativa do Peirao de Arcade, onde se desenvolverá a festa. Nesta zona só poderán acceder con vehículo as persoas residentes no Peirao, os vehículos de carga e descarga autorizados, as autoridades e as persoas con mobilidade reducida.
Para este último grupo habilitarase ademais unha zona de aparcadoiro onde a rotonda da Ostreira, no peirao, para facilitar a accesibilidade á Festa da Ostra.
Por outra parte, o domingo 7 de abril, día grande da festa, cortarase totalmente o acceso ao peirao a través da rúa Forneira entre as 10:30 e as 16:30 horas. Esta rúa quedará unicamente habilitada para incorporarse á N-550 desde o propio Peirao. Calquera acceso ao peirao durante ese treito horario e en xeral durante todo o transcurso da Festa da Ostra deberá realizarse a través da rúa Rosalía de Castro.
O alcalde de Soutomaior, Manu Lourenzo, animou a desfrutar dun evento único. "Esta Festa da Ostra vai ser unha edición moi especial, grazas ao agarimo e traballo que están poñendo os ostreiros, adegueiros, comerciantes locais e todas as persoas que achegan o seu gran de area. Que ninguén se perda a XXXVI Festa da Ostra se quere vivir unha experiencia inesquecible".
Relacionadas:
-
Milleiros de persoas participan nunha exitosa Festa da Ostra
Por Cristina Saiz & Anxo Lourido |
-
Todo preparado para o día grande da Festa da Ostra
Por Redacción |
-
Homenaxe á ostreira Isabel Seoane no comezo da 36 edición da Festa da Ostra
Por Redacción |
-
Soutomaior agarda 30.000 persoas esta fin de semana na Festa da Ostra, que prevé servir 100.000 pezas
Por Redacción |
-
Soutomaior prepárase para unha Festa da Ostra máis inclusiva e para todas as persoas
Por Redacción |
-
A Ostra de Arcade chega aos centros educativos da man de Divulgaciencia
Por Redacción |
-
A mocidade de Soutomaior infórmase de Noctámbulas e da Festa da Ostra
Por Oskar Viéitez |
-
A ostreira Isabel Seoane Amoedo pon imaxe ao cartel da XXXVI Festa da Ostra de Arcade
Por Redacción |
-
O escritor Manuel Lourenzo pregoará a XXXVI edición da Festa da Ostra
Por Redacción |