En Barro tamén se chega aos 100 anos: Erundina Pérez, a última en celebrar o seu centenario
Por Redacción
Emocionada e algo impresionada recibía Erundina Pérez a uns visitantes moi particulares. Este xoves converteuse na primeira usuaria do servizo de axuda no fogar de Barro en cumprir 100 anos. Un aniversario que ben merecía unha celebración ao grande. Esperta dende primeira hora da mañá, vestiuse as súas mellores galas e esperou pacientemente a que chegasen os seus convidados.
Xunto a ela, a súa inseparable sobriña, que a acompañou durante esta xornada tan especial. Sobre a unha e media da tarde, o timbre da porta anunciaba a chegada das persoas que acudiron expresamente para felicitala polo seu aniversario. Entre elas, traballadores da empresa Idades SL, responsable do servizo de axuda no fogar de Barro, e a concelleira de Servizos Sociais.
Erundina, sorprendida da presenza dos fotógrafos, pouco tardou en afacerse a pousar para as cámaras. Fíxoo primeiro co biscoito de aniversario que lle prepararon para a ocasión e despois co ramo de flores e a tarxeta de felicitación que lle trouxeron os seus convidados.
Os seus 100 anos convértena nunha das veciñas máis veteranas de Barro, unha condición á que, como ela mesma recoñece, non pretende renunciar a curto prazo. E vista a vitalidade coa que se celebrou o seu centenario, seguro que, se puidese, o celebraría ao grande coas súas outras 34 compañeiras deste servizo e coas súas coidadoras. "Son case como a miña segunda familia", asegura.