Marín revive preto de catro séculos de tradición coa Danza das Espadas na honra de San Miguel
Por Redacción & Diego Torrado
Os marinenses botáronse á rúa este domingo para celebrar o seu día grande, o do patrón da vila San Miguel, participando nos actos programados durante toda a xornada.
Como cada ano o principal foi a procesión á conclusión da Misa Solemne, na que se reviviron preto de catro séculos de tradición coa popular Danza das Espadas, un ritual declarado hai poucos anos como Interées Turístico de Galicia e que forma parte do patrimonio cultural inmemorial de Marín.
As asociacións Meigas e Trasnos e o Ateneo Santa Cecilia foron os encargados da representanción, con paradas fronte ao templo, no Palco de Música e a Praza de España, ante a atenta mirada de centos de veciños.
Antes a xornada arrancou co acto de benvida aos novos confrades e o recoñecemento do Padroado de Mareantes San Miguel, que este ano recaeu en Lupe Ave Souto, Clodio González Pérez, Jaime Rodríguez Pazos, o coro Thalassa e a título póstumo en José Teijeira Martínez.