Un 'abrazo' ao IES Luis Seoane para protestar polos recortes na educación pública
Por Diego Espiño
A Plataforma en Defensa do Ensino Público protagonizou este martes un abrazo simbólico ao Instituto de Ensino Secundario Luis Seoane de Monte Porreiro en sinal de protesta pola situación actual do ensino.
Representantes sindicais, pais e algúns dos alumnos do centro participaron na iniciativa, que se leva a cabo nas catro capitais de provincia de Galicia.
Entre as queixas expresadas pola plataforma encóntrase a perda de profesorado, o incremento dos contratos temporais, o peche de unidades de infantil e primaria ou a supresión de ciclos formativos na comunidade.
Ademais, segundo explicou o secretario da federación de educación de UGT na comarca Raúl Gómez, "o modo de implantar a Lomce en Galicia, de maneira trapalleira e precipitada, sen contar con recursos", está provocando problemas en diferentes centros educativos, principalmente pola "falta de profesorado" e porque hai, defende, "máis de 1.000 profesores impartindo materia que non son a súa especialidade e por tanto deterioran masivamente o ensino", en relación ás denominadas materias afíns.