Recoñecen que a implantación da factura electrónica "vai orixinar certos problemas" en Pontevedra
Por Alejandro Espiño
O goberno municipal recoñece que a implantación da factura electrónica "vai orixinar certos problemas". Dende o pasado 15 de xaneiro, os provedores do Concello de Pontevedra e os seus organismos autonómos deben rexistrar as súas facturas a través do programa FACE, deseñado polo Ministerio de Facenda e Administracións Públicas e a súa aparente complexidade xa provocou numerosas consultas.
En todo caso, o concelleiro de Facenda, Raimundo González, cre que non vai afectar de xeito "grave" ao período medio de pagamento. ÿ dicir, descarta que os provedores vaian tardar máis en cobrar ao ter que proceder deste xeito. Iso si, destaca que tamén poden producirse disfuncións puntuais na "engranaxe" da propia administración municipal.
Raimundo González desvelou tamén os datos de pagamentos a provedores no último trimestre de 2014, entre outubro e decembro. Nestes tres meses, o Concello de Pontevedra pagou 12.274.338,08 euros en facturas e o período medio de pagamento subiu ata os 23,08 días. Isto débese, explicou, a que probablemente se atrasase unha certificación importante ou algún expediente relativo á última modificación de crédito.
Ademais, o Pazo da Cultura pagou 324.758 euros a unha media de 16,40 días e o Instituto Municipal de Deportes (IMD) 164.208 euros, cunha demora de 18,64 días.
Trátase en todo caso, sinalan dende o goberno municipal, de prazos inferiores aos que recolle a lei, que sitúan un máximo de trinta días.
Relacionadas:
-
A factura electrónica deixa de retrasar o pago aos provedores do Concello
Por Redacción |
-
Un cambio normativo e a factura electrónica atrasan os pagamentos a provedores do Concello
Por Alejandro Espiño |
-
A Deputación inicia a licitación pública a través de medios electrónicos
Por Redacción |
-
Os pontevedreses 'deben' ao Concello máis de 26 millóns de euros en taxas, impostos e multas non pagadas
Por Alejandro Espiño |
-
A Deputación 'presume' de saúde económica: paga aos seus provedores en 14 días
Por Redacción |
-
Pontevedra reduce a 16,76 días a demora no pago a provedores durante o terceiro trimestre do ano
Por Redacción |