Debía ser o penúltimo día do Entroido 2015, pero foi tan só o penúltimo sábado. Poio enterrou ao Galo Fodorico, habitual punto e final a un mes de festexos, pero o mal tempo obrigou a variar o calendario deste ano e aínda está pendente o desfile e enterro do Galo Bruxo, que se celebrará o próximo sábado 21 de marzo.

O cortexo fúnebre de Fodorico, un dos catro símbolos do Entroido que se enterra en Poio, saíu este sabado a praza do Mosteiro de San Xoán e foi incinerado na Praza de Arís. Entre un e outro punto, houbo choros de dor por ter que dicir adeus a tan insigne veciño, pero deseguida deron paso á festa e a alegría propias desta época do ano, que se ven incrementadas nun municipio con tanta tradicio nestas lides como Poio.

O usuario de máis idade do taller da memoria de Saudemente, Modesto Pazos, coñecido como O Chavo, foi un dos protagonistas da noite. A pesar dos seus 92 anos, prendeu lume ao galo previamente confeccionado polos alumnos dos colexios do municipio.

As asociacións culturais Todos contra o lume (Arís) e Ronsel (Sartal) aproveitaron para celebrar a cuarta edición da Festa do Choqueiro cun concurso, con comida típica e amenización musical co Dúo Prisma e a actuación dun DJ.

Pantalla completa