Hotusa explotará o Gran Hotel de La Toja e o Balneario, nos que investirá 4 millóns de euros
Por Oskar Viéitez
O Grupo Banco Popular chegou a un acordo co Grupo Hotusa para alugarlle o Gran Hotel da Toja e o Hotel Balneario Isla de La Toja, nos que investirá 4 millóns de euros. Así o anunciaron este martes cun comunicado no que informan deste acordo do grupo financeiro que preside Ángel Ron.
Ambos os dous hoteis formarán parte de Eurostars Hotels e intégranse á cadea, que alcanza xa os 80 establecementos en 15 destinos, en réxime de arrendamento.
O Banco Popular, propietario do establecemento, elixiu a Grupo Hotusa como "a mellor das opcións" de entre o elenco de cadeas que optaban á explotación destes dous representativos establecementos.
O presidente de Grupo Hotusa, Amancio López Seijas, asegurou que "é para nós un orgullo e un privilexio ter a oportunidade de xestionar dous hoteis deste nivel que son, á par, auténticos referentes".
"Asumimos este reto -continúa López- coa seguridade de que, con traballo e un necesario investimento, que ciframos en 4 millóns de euros, lograremos que, nesta nova etapa, o Eurostars Gran Hotel La Toja (cinco estrelas) e o Eurostars Isla de la Toja (catro estrelas) manteñan e mesmo reforcen o esplendor que estivo sempre asociado á súa imaxe e oferta de servizos".