Xulgan a porta pechada unha parella por agredir sexualmente dúas fillas menores
Por Oskar Viéitez & Mónica Patxot
A Sección segunda da Audiencia provincial de Pontevedra celebrou este martes a porta pechada debido ás "circunstancias excepcionais" que se dan no xuízo iniciado hoxe contra unha parella acusada de abusos sexuais continuados ás súas dúas fillas menores de idade e dun delito de obstrución á xustiza.
Antes de iniciarse a vista oral, como cuestións previas os letrados da defensa mostraron o seu rexeitamento a que as nenas testificasen por videoconferencia e reclamaron a súa presenza na sala "aínda que sexa detrás dun biombo", sinalou un letrado. Non obstante, o tribunal admitiu que as menores declaren por video sen ter que achegarse á sede xudicial.
A fiscal pide sesenta anos de prisión para cada un dos pais que accederon á sala engrilletados xa que se encontran en prisión provisional por esta causa dende o 30 de setembro de 2013.
En concreto, a representante do Ministerio Público solicita 15 e 13 anos e medio de cárcere, para cada un polas agresións sexuais que presuntamente sufriron cada unha das menores. Ademais pide outros dous anos de prisión por un delito de obstrución á Xustiza por amedrentar as nenas para que mentisen nun xuízo anterior contra o pai no que estaba acusado por maltrato.
Por este último delito tamén pide unha multa de 14 meses a 12 euros de cota diaria, un total de 5.040 euros a cada un dos pais.
O Ministerio público pide que ambos os dous proxenitores indemnicen as dúas nenas menores con 60.000 e 30.000 euros e que se lles retire a patria potestade durante o tempo da condena.
Finalmente a Fiscalía tamén solicita que no caso de ser condenados, unha vez cumprida a condena que se dite unha orde de afastamento de ambas as dúas menores polo tempo de 45 anos.
Segundo o escrito de acusación, os feitos que se xulgan terían tido lugar no ano 2008, cando o pai, en conivencia coa súa muller, agrediu sexualmente a maior das nenas cando esta contaba con once anos de idade. Uns feitos que se repetiron un ano despois con outra das irmás que "tamén agredida sexualmente polos acusados" cando tiña nove anos de idade.
A Xunta asumiu a tutela dos catro fillos dos acusados e tamén se presenta no xuízo como acusación particular, se ben, a avogada non puido comparecer ante a sala ao estar de baixa médica.
Para protexer a identidade dos menores non se facilitará a identidade dos pais nin tampouco a localidade na que residían cos seus fillos.