Queixas pola suciedade da praia de Xiorto durante a fin de semana
Por Oskar Viéitez
O voceiro do Partido Popular de Poio, Ángel Moldes, trasladou este luns as denuncias dos veciños polo “lamentable estado da praia do Xiorto durante a fin de semana”.
As mareas vivas produciron unha grande cantidade de bocho que causou molestias a turistas, hosteleiros e veciños "e non foron retiradas durante toda a fin de semana, causando un grave prexuizo á economía da parroquia".
A acumulación das algas na area provocou as queixas dos bañistas "polas moscas e os malos cheiros", e moitos turistas, ante as malas condicións do areal, optaron por desplazarse ao veciño concello de Sanxenxo, segundo apuntan dende o PP.
"Literalmente non había a posibilidade de extender a toalla sin ser sobre as algas. Súmalle os insectos, os cheiros e a apariencia xeral de abandono. Esta é a imaxe do noso municipio que queremos trasladar? Esto é o mellor que pode ofrecer Poio nas súas praias ‘estandarte’?", preguntan os populares.
Moldes sinalou que o sucedido non só prexudicou puntualmente a economía de Raxó, senon que dana gravemente a imaxe do Concello como destino turistico.