Suspenden a condena de cárcere a dous toxicómanos a cambio da súa rehabilitación
Por Oskar Viéitez & Cristina Saiz
A Sección Cuarta da Audiencia de Pontevedra resolveu con dous acordos de conformidade senllos xuízos sinalados para este martes e que finalmente non chegaron a celebrarse en virtude dun acordo entre a Fiscalía e os avogados das defensas. Ademais as penas impostas serán suspendidas a cambio de que os acusados, ambos os dous toxicómanos, completen o proceso de rehabilitación.
No primeiro dos casos, o procesado Jesús C.C. recoñeceu trapichear con heroína en Cambados. No momento da súa detención portaba preto de 400 gramos. A fiscal pedía catro anos e medio de prisión que finalmente quedaron en 3 anos e 8.000 euros de multa.
No outro caso a acusada por tráfico de drogas era Manuela O.C., que recoñeceu que se encontraba na rúa Castelao da localidade do Grove, fronte á zona de pubs e discotecas, estando en posesión de diversas bolsiñas e papelinas con cocaína e heroína destinadas á súa venda. A pena inicial que pedía a fiscalía era de catro anos e seis meses de prisión, que tras alcanzarse un acordo quedou nun ano e sete meses.