Lores exporá en Madrid, invitado por Fomento, o modelo urbano de Pontevedra
Por Redacción
Pontevedra estará presente o próximo luns 5 de outubro na exposición da décima edición do Catálogo español de Boas Prácticas que se inaugurará na sede do Ministerio de Fomento.
O alcalde, Miguel Anxo Fernández Lores, será o que viaxe a Madrid para asistir á inauguración desta exposición na que se amosarán todos os proxectos que recibiron algún galardón na última convocatoria do premio internacional ONU-Hábitat.
Pontevedra formará parte desta exposición, ocupando un lugar protagonista, ao recibir o primeiro premio na categoría de Desenvolvemento territorial e urbano sostibles.
A inauguración da exposición enmárcase dentro da xornada de conmemoración do Día Municipal do Hábitat que organiza o Ministerio de Fomento a través da Dirección Xeral de Arquitectura, Vivenda e Solo e a Oficina de ONU-Hábitat de España baixo o lema "Espazos públicos para todos".
Durante a xornada haberá distintos relatorios nos que participará o alcalde, que destacou que Pontevedra está na "punta de lanza" das posicións ambientais que marca a ONU-Hábitat "e nos parece moi interesante falar dese tema", concluíu.