Chega un adianto dunha primavera fría a Pontevedra
Por Redacción
O bo tempo predominante nesta fin de semana manterase durante os vindeiros días provocando a chegada, ao municipio de Pontevedra, dun adianto dunha primavera fría, que oficialmente comezará o domingo 20 de marzo ás 4.30. Segundo MeteoGalicia, espéranse ceos practicamente despexados para a totalidade desta semana a excepción da xornada deste martes 15 de marzo, na que predominarán os claros e nubes. Así, en principio, non haberá probabilidades de choiva.
As temperaturas manteranse normais para esta época do ano. Con todo, as mínimas, que durante a xornada deste luns 14 roldarán os catro graos, ascenderán moderadamente ata alcanzar os oito graos este xoves. No referente as máximas, non se apreciarán cambios situándose así preto dos 20 graos, especialmente cara a fin de semana.
Para os vindeiros días predominarán ventos do leste de carácter feble e moderado.
Segundo a web oficial de meteoroloxía de Galicia, prognostícase unha fin de semana nas Rías Baixas tamén con ceos moi pouco anubrados ou despexados con temperaturas que roldarán entre os 15 e 20 graos, aínda que de madrugada serán baixas e poderán producir xeadas no interior. Así, vaticínase un inicio de Semana Santa con bo tempo.