Dúas de cada tres infraccións da lei antitabaco son por fumar en lugares prohibidos ou permitir facelo
Por Alejandro Espiño
Máis do 60% das 334 infraccións detectadas polas autoridades por incumprimentos da lei antitabaco en 2015 debéronse a persoas que fumaban en lugares prohibidos ou a aqueles que permitían facelo. Así se reflicte no balance publicado pola Xefatura Territorial da Consellería de Sanidade en Pontevedra.
Destas 334 infraccións detectadas na provincia -234 na área de Pontevedra e 100 na de Vigo-, deriváronse 237 sancións das que 169 foron de carácter leve e 68 graves.
Na demarcación territorial de Pontevedra, que comprende a capital e toda a área norte da provincia -coas comarcas de Pontevedra, O Salnés, Caldas ou Deza-Tabeirós-, con respecto ao tipo de infracción cometida foron 86 os incumprimentos da lei por fumar en lugares prohibidos e 58 por permitir fumar nos devanditos lugares.
Ademais, outras 72 infraccións cometéronse por non haber sinalización no local ou ser incorrecta e 18 por vender tabaco con ausencia de automatismo na máquina expendedora.
Pola súa banda, durante o último ano realizáronse 420 inspeccións. A metade delas foron a locais de hostalería, mentres que outras 86 foron a particulares, 45 a locais de lecer nocturno, 34 a hoteis, 23 a estacións de servizo e 22 a outro tipo de negocios.
Do total de inspeccións, 214 orixináronse por actuacións das forzas de seguridade e 206 por inspeccións de oficio. Outras cinco iniciáronse por denuncias particulares.