Castelao defende os lombos e presenta alegacións contra a súa eliminación
![Alejandro](/web/cache/scene/uploads/xornalistas/foto/dee/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/5624216432-20150128-patxot-alex-espino-002.jpg)
Por Alejandro Espiño
![](/web/cache/scene/uploads/fotos/foto/bbf/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/570d0f542d-20160412-patxot-registro-lombos-alegaciones-castelao-014.jpg)
© Mónica Patxot
![](/web/cache/scene/uploads/fotos/foto/37e/_S7QytKoutjK3UsovKMnMzytWsi62MjK0UipKLc6sStUxMjDQSU_/_7NK0kt0inJL1CyrgUA_/570d0f6917-20160412-patxot-registro-lombos-alegaciones-castelao-009.jpg)
© Mónica Patxot
Lombos si porque "conseguen un efecto que queremos todos", segundo o presidente da Federación de Asociacións de Veciños Castelao, Juan Loureiro, que é a redución da sinistralidade viaria e do número de atropelos na cidade. Por iso, o colectivo presentou unha alegación contra a ordenanza de circulación que quere modificar a oposición para regular a instalación destes elementos reductores de velocidade.
Ademais desta alegación propia, Castelao fixo entrega este martes de máis de 1.100 alegacións individuais de persoas e colectivos que se suman a esta reivindicación.
Neste documento, segundo explicou Juan Loureiro, pídese ao Concello que non se tramite esta modificación da ordenanza de circulación pola vía de urxencia e que se elimine da reforma o artigo 78 bis que regula os lombos.
"Queremos que todo continúe como ata o de agora e se hai algún que modificar, que somos conscientes de que si, que se faga", explicou o dirixente veciñal, que sinalou que en todo caso os lombos habería que adaptalos non á normativa de Fomento, senón á aprobada recentemente pola Deputación que é, apuntou, "moito máis sensible" á situación da cidade de Pontevedra.
A federación veciñal rexeita que, como marca esta reforma da ordenanza, que no prazo de dous anos se modifiquen todos os lombos para adaptalos á recomendación estatal porque iso supoñería, dixo Loureiro, un desembolso económico "moi importante" para o Concello de Pontevedra.
Ademais, a aplicación "estrita" desta ordenanza provocaría un "problema" nas beirarrúas de moitas rúas, creando unha estética "controvertida" e supoñería a desaparición destes lombos nas estradas do rural "cando son os veciños os que os están pedindo".