Dous puntos negros de Pontevedra, entre as estradas máis perigosas do país
Por Redacción
Ata dúas estradas da provincia de Pontevedra atópanse entre os puntos negros máis perigosos para o tráfico. Así o denunciou un novo informe do Real Automóbil Club de España (RACE) sobre o nivel de risco en vías que forman a rede de estradas do Estado.
Trátase da N-640 entre Caldas de Reis e Vilagarcía, onde ao longo de 2016 producíronse trece accidentes importantes, con dúas vítimas mortais e quince feridos graves; e a N-541 entre Santa María de Sacos (Cotobade) e o cruzamento coa PO-224 en Bora (Pontevedra). Neste último houbo cinco accidentes graves, cun morto e catro feridos.
Ademais destes dous puntos negros, hai outros catro nos que, segundo o RACE, existe un alto risco.
Serían a N-541 entre Cerdedo e Santa María de Sacos, a N-550 entre Briallos (Portas) e Pontevedra e entre Paredes (Vilaboa) co cruzamento da N-552 en Redondela e a N-640 entre Bandeira e Foxo (Silleda).
Todas estas estradas axudan a que Galicia sexa a comunidade con máis tramos de risco elevado na estrada, cun total de 15 dos 77 existentes en España, nos que entre 2014 e 2016 acumúlanse 99 accidentes, con 17 falecidos e un centenar de feridos graves.