Dous novos axentes reforzan o plantel da Policía Local de Marín
Por Redacción
Marín amplía o seu persoal da Policía Local. A partir de agora estará composta por un total de 26 persoas, tras as dúas últimas incorporacións.
Trátase de dous axentes que ocuparán prazas convocadas polo sistema de mobilidade, é dicir, chegan a Marín procedentes doutros municipios. Así, un deles provén de Meaño e o segundo da Estrada.
Ambos foron recibidos este venres polo concelleiro delegado de Tráfico, Policía Local e Mobilidade, Paco Estévez.
Con estas dúas incorporacións, a Policía Local reforza un servizo que aten ao municipio as 24 horas ao día. Os axentes repártense en tres quendas diarias durante os 365 días ao ano.
Xunto con estas dúas incorporacións, o corpo fixo balance do traballo realizado en 2016 e que, en materia de seguridade viaria, resúmense na súa atención en 98 accidentes de tráfico, nos que non houbo ningunha vítima mortal, pero si doce feridos graves.
Ademais, colaboraron coa DXT en campañas polo uso do cinto, de control e vixilancia de alcol e drogas, control do transporte escolar e de menores, control e vixilancia das condicións do vehículo ou control de camións e furgonetas.
A Policía Local fixo seguimento de diversos casos de violencia de xénero, campañas de control e vixilancia do mercado, actuacións relativas ao lecer nocturno, horarios de peche e ruídos, a tramitación e colaboración nos recollida cans abandonados e denuncia aos seus donos ou a atención a diversos requirimentos cidadáns.
Os axentes tamén realizaron inspeccións a obras por requirimento municipal, atenderon visitas de escolares ás súas instalacións, deseñaron operativos especiais de tráfico e prestaron colaboración en numerosos eventos deportivos e festas.