As defensas piden a nulidade do xuízo por narcotráfico contra o "Mulo" e outros 12 implicados
Por Mónica Patxot & Anxo Lourido
No banco de acusados da Audiencia de Pontevedra sentaban este luns trece dos catorce detidos con motivo da operación contra unha rede de narcotraficantes que actuaba na contorna do Salnés e que presuntamente estaban liderados por Rafael Bugallo Piñeiro, coñecido polo sobrenome do Mulo. O acusado que faltaba non acudía ao comezo deste xuízo un dos procesados porque, segundo fontes xudiciais, a familia alegou que se atopaba fóra de España.
Os acusados enfróntanse a penas de 17 e 15 anos de prisión, que sumadas ascenden a 214 anos, cunha responsabilidade civil que se sitúan en preto de 23 millóns de euros, segundo a petición do Ministerio Fiscal.
Os procesados están vinculados ao intento de introducir nas costas galegas un alixo de 3.500 quilos de cocaína en agosto de 2008 nunha intervención que finalizaba cunha planadora de grandes dimensións varada e ardendo na praia da Lanzada.
Nesta primeira sesión só se trataron cuestións previas, os once avogados da defensa solicitaban a nulidade do xuízo ao entender que se infrinxiu o dereito fundamental ao segredo das comunicacións polas intervencións telefónicas realizadas aos acusados ao entender que non había motivacións para que fosen ordenadas. Tamén consideran que se creba o dereito constitucional á defensa ao non comunicarse os autos das prórrogas do segredo das actuacións por parte do xulgado de Cambados que tramitaba o caso.
O avogado Víctor Bouzas que defende a José Antonio Búa Padín sinalaba que o seu cliente estivera un ano privado de liberdade en prisión preventiva e o auto no que se decretara a prórroga comunicáranllo un ano máis tarde. Ademais apuntaba que se produciu unha quebra total no feito de que se derivaron cuestións que se recollían doutras operacións contra o narcotráfico.
Outro dos aspectos que alegaron avogados das defensas centrábase na dilatación do procedemento que se iniciaba en 2007 e estase xulgando dez anos máis tarde. Víctor Bouzas indicaba que estas consideracións poden ser cualificadas como graves ou, como pide a Fiscalía, como simples. Adiantou, por outra banda, que o seu cliente só responderá as preguntas da defensa. A acusación no seu caso céntrase na preparación da embarcación e, segundo o fiscal Pablo Varela, era o home de confianza de Rafael Bugallo que se encargaba tanto do transporte como da procura de persoas que participasen na operación.
O xuízo está previsto para toda a semana e renovarase este martes a partir das 10.00 horas co testemuño dos acusados.
Relacionadas:
-
A Audiencia retoma o xuízo contra a rede de narcos do 'Mulo' co testemuño dos investigadores
Por Redacción |
-
A Policía confirma que O Mulo era quen daba la última palabra no operativo da descarga de droga
Por Redacción |
-
Cinco dos 13 acusados no xuízo do Mulo rexeitan calquera relación coa descarga de cocaína
Por Redacción |
-
O Mulo alerta o tribunal de que está a recibir ameazas na sala durante o xuízo por narcotráfico
Por Mónica Patxot & Anxo Lourido |
-
Nove acusados no xuízo da planadora da Lanzada recoñecerán os feitos tras aparecer unha carta do Mulo
Por Anxo Lourido & Mónica Patxot |
-
14 persoas a xuízo polo alixo de 3.500 quilos de coca que ía nunha planadora queimada na Lanzada e apareceu flotando
Por Redacción |