Pontevedra retoma o servizo de teleasistencia tras deixar de pagalo a Deputación e o Imserso
Por Natalia Puga
Os veciños de Pontevedra prexudicados pola supresión do financiamento do servizo de teleasistencia domiciliaria ao deixar de pagalo o Imserso e, logo, a Deputación de Pontevedra, xa contan cunha atención regulada.
O Concello de Pontevedra anunciou este martes que xa atende, a través dun contrato subscrito con Cruz Vermella, a todas as persoas que dispoñían do servizo de teleasistencia coa empresa Eulen cando o prestaba a Deputación con financiamento compartido co Imserso e o Concello.
"A día de hoxe os novos dispositivos xa están distribuidos e funcionando con absoluta normalidade, agás os catro casos que asinaron o contrato que Eulen lles entregou cando lles foi a retirar os dispositivos", indican dende o Goberno local pontevedrés.
Engaden que estas catro persoas xa se dirixiron ao servizo de Consumo polo que o Concello está á espera para darlles unha nova alta.
No caso deste servizo municipal e á vista dos datos económicos dos usuarios, decidiuse que non estaría suxeito a copago Polo tanto, será de balde para todas as persoas que neste momento dispoñen do servizo.
Segundo as estimacións municipais, a xestión do copago sería máis custosa que o recadado. Ademáis, "deste xeito, evítase deteriorar máis a economía dos usuarios que precisan a teleasistencia, xa de por si moi debilitada debido ao copago sanitario, á conxelación das pensións, á suba do IVE e ao resto das medidas económicas que teñen especial incidencia nos que precisan máis atencións como é o caso dos maiores".