A Subdelegación de Defensa en Pontevedra inicia un novo proceso selectivo para cubrir 2.500 prazas de militares
Por Redacción
Este luns iníciase na área de recrutamento da Subdelegación de Defensa en Pontevedra, o proceso de selección, polo sistema de concurso-oposición, para cubrir 2.500 prazas para militares profesionais de tropa e mariñeiría.
Estas prazas distribúense entre o Exército de Terra (1.675), a Armada (450) e o Exército do Aire (375). Das prazas para o Exército de Terra, os estranxeiros de países cos que se ten un convenio de colaboración, poden optar a 44 en concorrencia cos nacionais.
Desas prazas, en Galicia e zonas próximas, o Exército de Terra convoca para unidades da Brigada de Infantería Lixeira "Galicia VII", 30 en Figueirido (Pontevedra) e 45 en Siero (Asturias). A Armada convoca 75 prazas para buques e unidades da zona norte (Ferrol, Tui, Marín, San Sebastián, Bilbao), e o Exército do Aire convoca 1 praza para o Escuadrón de Vixilancia Aérea de Noia (A Coruña) e 6 para a Academia Básica do Aire en León.
Na convocatoria recóllense as condicións para poder participar no proceso, entre as que cabe destacar:
- Ter cumpridos 18 anos e non superar a idade máxima de 29 anos o día de incorporación ao centro de formación militar correspondente.
- Estar en posesión dos niveis de estudos ou da titulación esixida que como mínimo será o de título de Graduado en Educación Secundaria Obrigatoria ou os seus equivalentes.
Para participar no proceso selectivo é necesario solicitar cita previa. O prazo para solicitar cita para participar no proceso vai do 4 ao 25 de setembro.