Rematan as melloras nas infraestruturas de subministro de augas en Lourido, Piñeiro e Vilar
Por Oskar Viéitez
O Concello de Cerdedo-Cotobade vén de acometer, por medio da súa brigada municipal de Obras, diversas melloras nas infraestruturas de subministro e servizo de augas nos lugares de Lourido, Piñeiro e Vilar, todos eles pertencentes ao territorio de Cerdedo.
Estas actuacións xa rematadas pretenden deixar as instalacións de abastecemento nas mellores condicións antes da chegada do inverno.
Noutra orde de cousas, a brigada tamén acometeu estes días o desbroce e limpeza das vías en Barro co obxectivo de mellorar a visibilidade e o tránsito en aras da seguridade vial da zona.
LIMPEZA DE FINCAS
O Concello de Cerdedo Cotobade actuou de oficio na limpeza e desbroce de varias fincas para a prevención de lumes forestais.
Tras a campaña informativa e a apertura de 50 expedientes, a práctica totalidade dos propietarios procedeu a adecentar os seus predios.
A brigada municipal executou algunhas limpezas ordeadas polo Concello, sobre todo na zona de Pazos de Borela, que tiña un risco alto.