O custo da reforma do edificio da Xunta en Benito Corbal superará os 5 millóns de euros
Por Redacción
Ata os 5,1 millóns de euros ascenderá finalmente o investimento previsto na rehabilitación da antiga delegación da Xunta en Pontevedra, situada na rúa Benito Corbal. O Consello da Xunta autorizou este xoves a contratación das obras, que reformarán un espazo duns 5.800 metros cadrados e terán un prazo de execución de quince meses.
O custo aumenta, segundo o presidente do goberno galego, despois de coñecer con detalle as necesidades do proxecto.
Un total de 4,7 millóns corresponden coa obra propiamente dita e o resto a traballos técnicos, algúns deles xa finalizados.
Estes traballos converterán a antiga sede da Xunta na cidade, destacou Alberto Núñez Feijóo, nun espazo "moderno, cómodo, accesible e versátil para todos os usuarios". Nel, primará a eficiencia enerxética facendo un inmoble cunha cualificación enerxética A, tanto con respecto ao consumo de enerxía primaria non renovable como en emisións de CO2.
A rehabilitación do edificio ten como obxectivo poder dispoñer dun edificio enerxeticamente eficiente polo que se aplicarán métodos e tecnoloxías enerxéticas eficientes, como caldeiras de biomasa para a calefacción, bombas de calor de tecnoloxía VRV para calefacción e refrixeración, instalación solar fotovoltaica para xeración de electricidade, así como elevados niveis de illamento térmico e sistemas de iluminación eficientes.
Nas tres primeiras plantas -o semisoto e o primeiro e segundo andar- situaranse as oficinas de emprego da Xunta, que na actualidade están en dous locais alugados na cidade, na rúa Eduardo Pondal. Estes servizos vanse concentrar nun único espazo, o que facilitará a prestación do servizo ao cidadán. A superficie para este fin será de 1.544 metros cadrados.
Nas plantas terceira e cuarta, a Xunta poñerá á disposición de entidades e asociacións de interese social e sanitario un espazo para situar as súas oficinas e locais. Estas plantas terán acceso independente dende a rúa e a súa superficie total será de 1.156 metros cadrados.
Finalmente, as catro plantas restantes -da quinta á oitava- estarán á disposición da Universidade de Vigo para que instale alí os servizos e proxectos que decida a institución académica. A superficie para estes usos será de 1.740 metros cadrados.
O anuncio da licitación da obra publicarase no mes de outubro para dar comezo coas obras a finais de ano e ter o edificio rematado no mes de marzo do ano 2019, tendo en conta os quince meses de execución de obras que están previstos no proxecto.
Relacionadas:
-
Millóns autonómicos para grandes proxectos en marcha
Por Diego Espiño |
-
"Non coñezo unha lexislatura como esta para Pontevedra. Será histórica"
Por Alejandro Espiño & Mónica Patxot |
-
A sede do Campus Crea ocupará catro plantas do edificio da Xunta en Benito Corbal
Por Alejandro Espiño |
-
A Xunta establecerá criterios "o máis obxectivos posibles" para repartir o seu edificio de Benito Corbal
Por Alejandro Espiño |
-
A Xunta licitará esta semana a rehabilitación da súa antiga sede en Pontevedra
Por Oskar Viéitez |
-
Rueda anuncia que está moi avanzado o proxecto de reforma da ponte da Barca
Por Redacción |
-
Rueda destaca que "nunca se deu" un compromiso investidor "tan grande" da Xunta en Pontevedra
Por Oskar Viéitez & Mónica Patxot |
-
O edificio da Xunta en Benito Corbal abre as súas portas para un 'recoñecemento'
Por Alejandro Espiño & Mónica Patxot |