Traballadores do Príncipe Felipe piden a continuidade do Centro de Primeira Acollida
Por Oskar Viéitez
Os traballadores do Centro de Primeira Acollida da Cidade Infantil Príncipe Felipe presentaron por rexistro un escrito no que mostran o seu "total desacordo" co peche desta unidade e solicitan que se retomen as negociacións coa Xunta de Galicia para un posible acordo que permita a continuidade deste recurso.
Despois de decatarse da decisión do peche do centro polos medios de comunicación, estes profesionais mostran o seu rexeitamento "ás formas" coas que a deputada delegada en materia de Servizos Sociais, Eva Vilaverde, anunciou esta medida "sen falar previamente cos responsables e traballadores do centro".
Tamén expresan a súa "desconformidade coa información transmitida aos medios de comunicación" por parte dos responsables da Deputación de Pontevedra xa que, ao seu xuízo, "reflicten un total e absoluto descoñecemento do traballo que se realiza e das intervencións levadas a cabo".
Neste sentido puntualizan que a Unidade de Primeira Acollida é un centro especializado, único na comunidade galega, pertencente á Deputación de Pontevedra, que está destinado a acoller con carácter de urxencia e por un curto período de tempo a aqueles menores que se atopan nunha grave situación de desprotección ou cun alto risco físico ou psíquico durante os 365 días do ano e nas 24 horas do día.
"Non é un centro de cumprimento de medidas xudiciais de internamento", puntualizan.
Desde a súa apertura no ano 2002, o centro atendeu máis de 100 menores ao ano, e apuntan estes traballadores que "en momentos puntuais e de forma excepcional, os mozos acollidos poden presentar problemas de conduta derivados da súa propia historia de vida e precisan dunha atención especializada".
Os profesionais do Centro de Primeira Acollida, tras a avaliación pertinente, póñeno en coñecemento da Xunta de Galicia e solicitan o traslado o máis inmediato posible, a un centro adaptado ás súas necesidades.
Estes traballadores solicitan no seu escrito que a deputada delegada se reúna de maneira urxente cos profesionais deste centro para coñecer de primeira man o traballo que se realiza e a importancia do mesmo.
Relacionadas:
-
O PP defenderá na Deputación o mantemento da Unidade de Primeira Acollida no Príncipe Felipe
Por Oskar Viéitez |
-
Comisións Obreiras pide unha reestruturación do Príncipe Felipe para acoller a máis menores
Por Anxo Lourido |
-
A Xunta pecha a Unidade de Primeira Acollida da cidade infantil Príncipe Felipe
Por Oskar Viéitez |
-
Comisiones Obreras entrega á Fiscalía de Menores un informe sobre as "agresións e desfeitas" en Príncipe Felipe
Por Redacción |
-
Comisións Obreiras pide que se habilite unha unidade específica no Príncipe Felipe para acoller a menores conflitivos
Por Oskar Viéitez |
-
Reiteran a denuncia de agresións de menores a educadores do Príncipe Felipe
Por Mónica Patxot & Anxo Lourido |